Partimos da premisa de que o alumno non sabe nada, polo que os primeiros días os dedicamos a coser á man, coñecer e manexar a máquina de coser, as ferramentas que se necesitan, e as caracteristicas básicas do noso material, a tea… e unha vez dominada esa parte comezamos coa patronaxe, e a confección de prendas sinxelas.

Bloque principal. A este bloque dedicámoslle o 70% do total de curso entre clases teóricas e prácticas. Subdividímolo en tres partes.

– Deseño: Os alumnos aprenden a expresar as súas ideas mediante a linguaxe universal do debuxo, non fai falta saber debuxar, utilizamos ferramentas básica e algún “truquiño” para que os deseños que temos na cabeza luzan como os feitos por un deseñador.

– Patronaxe: O gran piar sobre o que se sustenta a moda. Xa o dicía Cristóbal Balenciaga: “Un bo couturier debe ser arquitecto da forma, pintor para a cor, músico para a harmonía e filósofo para a medida“. Cunha metodoloxía sinxela aprendemos a facer os grandes bloques do patronaxe para ir aos poucos incorporando outros máis complexos e así mesturalos para que, como se de ingredientes de tratase, facer realidade os deseños que tiñamos sobre o papel. Maioritariamente realizamos patronaxe de muller, pero aos poucos e grazas á presenza, cada vez maior, de homes na especialidade, estamos a incorporar patronaxe masculino. Somos unha especialidade viva que se adapta, como a moda, ás necesidades do momento.

– Confección: A confección apréndese cosendo polo que dedicamos gran parte das nosas clases a iso. Para isto realizamos exercicios de montaxe de partes específicas das pezas, para probar, equivocarnos e aprender; así cando teñamos que facer a peza non nos atopemos con sorpresas desagradables. Todos os trimestres traballamos ao redor dun tipo de peza: saias, camisas, vestidos, pantalóns, abrigos…

Bloque complementario. O mundo da moda é moi extenso e na especialidade non queremos deixar pasar por alto certos temas que nos axudan a formar unha visión mais completa da moda. Para iso dedicamos o 30% da especialidade a outros temas, como a tipoloxía do corpo humano, as materias téxtiles e a historia da Moda.

– A tipoloxía do corpo humano é un tema clave para lograr pezas que se axusten correctamente a diferentes siluetas. Os alumnos aprenden a recoñecer as particularidades de cada tipo de corpo e como adaptar as súas creacións para resaltar as virtudes e disimular as posibles imperfeccións. Este coñecemento é crucial para traballar no deseño personalizado e na produción de pezas que non só sexan esteticamente atractivas, senón tamén cómodas e funcionais.

– Materias téxtiles: O recoñecemento das teas é un tema imprescindible dentro da moda e desta especialidade. Coñecer as fibras téxtiles, a súa orixe, as características, as propiedades e como están feitos os de diferentes tecidos danlle ao alumnado unha bagaxe imprescindible á hora de escoller tecidos para os seus proxectos.

– Historia da moda: é outro tema esencial que forma parte do programa. O alumnado aprende sobre as principais correntes e movementos da moda ao longo dos séculos, desde as súas orixes ata as tendencias actuais. Este coñecemento permítelles contextualizar a moda dentro dun marco histórico e cultural, ademais de ofrecerlles inspiración para as súas propias creacións. A historia da moda tamén lles ensina a recoñecer os cambios nos gustos, as influencias sociais e as revolucións estilísticas que marcaron as transformacións da industria téxtil ao longo do tempo.